هنا كانت واقفه في البلكونه
حازم كان سامع كلامهم وساكت، وبعدين قرب وقال بصوت واطي بس مسموع، انتي مرتي من يوم ما اتولدتي، وده كلام جدودنا وكلام عمك الله يرحمه، وأنا راجع مخصوص عشان آخدك من القاهرة للصعيد، بس هسيبك تخلصي جامعتك احتراماً لعمي، لكن من النهاردة مفيش نزول بعد الساعة تمانية ومفيش لبس قصير ومفيش صحاب ولاد.
هنا انفجرت فيه وقالت انت مجنون يا ابني، مرات مين يا صعيدي يا متخلف، أنا لا يمكن أتجوز واحد زيك، ولا يمكن ألبس على مزاج حد، انت فاهم، انت جاي من لندن ولا جاي من الجبل، انت ايه التخلف ده.
حازم ضحك ضحكة باردة وقال بكرة تعرفي مين الصعيدي يا بنت عمي، ولسه بدري على الكلام ده. ومن اليوم ده ابتدت الحرب، حازم قعد في شقة فوقيهم كان أبو هنا شاريها زمان، وبقى رايح جاي عليهم كل يوم، يمنعها تخرج، هنا كانت بتعند أكتر، كانت تلبس فستان أقصر وتخرج مع صحابها ميار ويارا، ميار كانت صاحبتها الانتيم من الطفولة، بنت مجنونة وبتشجعها على أي حاجة، ويارا كانت العاقلة اللي دايما تقولها يا هنا اهدي، حازم شكله بيحبك بجد وغيرته دي حب.
ومرة هنا كانت خارجة مع كريم، زميلها في الجامعة اللي كان معجب بيها، وكانوا قاعدين في كافيه في الزمالك، وفجأة لقت حازم داخل عليهم زي القطر، عينيه بتطلع نــ,,ـــــار، مسكها من دراعها قدام الناس كلها وقالها قومي معايا، كريم قام وقاله انت مين وازاي تمسكها كده، حازم بصله بصة خلت كريم يرجع لورا وقال أنا جوزها، ولو شفتك معاها تاني هكسر رجلك.
هنا اتحرجت جدا وزعقت فيه طول الطريق، انت ازاي تحرجني قدام صحابي، انت فاكر نفسك اشتريتني، انت واحد همجي، حازم ساق العربية بسرعة جنونية وهو ساكت، وبعدين وقف مرة واحدة وقالها عشان انتي مرتي، ومرت حازم الصعيدي متقعُدش مع راجل غريب، انتي فاهمة ولا لا.
هنا قالت له أنا مش مراتك ومش هبقى مراتك حتى لو آخر راجل في الدنيا، أنا بكرهك. حازم قالها هتحبيني، غصب عنك هتحبيني، لأني مش هسيبك لحد غيري. الأيام كانت بتعدي وكل يوم خناقة أكبر، لحد ما جه يوم تخرجها، هنا كانت لابسة فستان تخرج جميل جدا ومبسوطة، ميار ويارا كانوا معاها وبيتصوروا، ومعاذ أخو ميار كان جاي يصورهم، معاذ ده كان شاب محترم وطيب وبيحب هنا من بعيد لبعيد وعمره ما قالها، حازم جه الحفلة ولما شاف معاذ بيصور هنا وهي بتضحك وبيقرب منها اتجنن، راح شد التليفون من ايد معاذ ورماه على الأرض، وقال لمعاذ انت بتصورها ليه، انت مين أصلا.
