كذبه القدر

ميار كانت واقفة في المطبخ بتغسل المواعين وايدها دايبة من المية الساقعة ودموعها نازلة على خدها بس بتحاول متبينش صوتها عشان محدش يسمعها، اصلها من شوية سمعت امها وهي قاعدة في الصالة بتقول لخالتها بصوت واطي انها خايفة ميار تعنس وتفضل قاعدة جنبهم، ميار عندها تمانية وعشرين سنة، متخرجة من كلية تجارة وبتشتغل في مكتبة صغيرة في وسط البلد مرتبها يدوب بيكفي مواصلاتها وفطارها، ساكنين في شقة ايجار قديم في حتة شعبية كل الناس عارفة بعض، ابوها راجل طيب على قد حاله بيشتغل سواق على ميكروباص، واختها الصغيرة لينا لسه في تالتة كلية اداب وبتحلم تتجوز جوازة حلوة، طول الوقت كلامهم في البيت انتي لازم تتجوزي، ابن خالتك مستنيكي، ابن الجيران شافك وعايز رقمك، وهي زهقت وتعبت بجد من احساس انها بقت عبء وتقيلة على اهلها وانهم عايزين يخلصوا منها باي طريقة.
وفي نفس اليوم وهي راجعة من الشغل متأخرة والدنيا كانت بتشتي خفيف، الشنطة القماش بتاعتها اتقطعت وكل الكتب اللي كانت شايلاها وقعت في نص الشارع والعربيات بتزمر، فجأة وقفت عربية سودا غالية جدا ونزل منها شاب لابس بدلة شكلها غالي وساعة شكلها اغلى، نزل يلم معاها الكتب من غير ما يقرف ولا يتردد،

قالها انتي كويسة؟ حصلك حاجة؟ قالتله اه شكرا انا كويسة، قالها طب استني اوصلك في طريقي الجو بيشتي، قالتله لا شكرا انا ساكنة قريب جدا، هو صمم يديها الكارت بتاعه وقالها لو احتاجتي اي حاجة كلميني، انا نائل، مكتوب عليه نائل السيوفي شركة السيوفي للاستيراد والتصدير، ميار خدت الكارت وحطته في جيبها ومشيت وهي مكسوفة.
روحت البيت وحكت لصاحبتها الانتيم تولين اللي شغالة معاها في نفس المكتبة، تولين بنت لمضة وبتحب الافلام العربي القديمة وبتحب تقلف قصص، قالت لها يا بت يا ميار ده شكله غني وابن ناس، ما تستغليه وتقوليلهم في البيت انه حبيبك وبيحبك وعايز يخطبك عشان يبطلوا زن وقرف العرسان اللي بيجيبوهملك كل يوم، ميار في الاول قالت لا طبعا انتي مجنونة انا مقدرش اعمل كده ده كدب وحرام، بس بعدها باسبوع واحد بس امها جابت لها عريس عنده خمسة واربعين سنة ومتجوز قبل كده ومطلق ومعاه عيال وعايزها تسيب الشغل وتقعد في البيت تربي عياله، ميار ساعتها انهارت وحست انها لازم تعمل اي حاجة، طلعت الكارت من الدرج وقررت تكلم الرقم.
كلمته وهي ايدها بتترعش وقالتله الو استاذ نائل انا ميار بتاعة الكتب اللي وقعت في الشارع، انا عارفة ان اللي هقوله ده مجنون جدا بس ممكن نتقابل خمس دقايق بس مش اكتر؟ نائل ضحك وقالها طبعا فاكرك تعالي نتقابل بكرة في كافيه على النيل، اتقابلوا تاني يوم، ميار كانت متوترة جدا ووشها احمر وقالتله بص من الاخر كده انا اهلي ضاغطين عليا في الجواز بطريقة صعبة وانا عايزاك تمثل انك حبيبي لمدة شهر واحد بس، تيجي مرة واحدة تتغدى عندنا وتقول انك بتحبني وعايز تخطبني بس عندك ظروف شغل وهتأجل الخطوبة شوية، وانا مستعدة ادفعلك اللي انت عايزه او اشتغل عندك ببلاش في الشركة.
نائل فضل ساكت شوية بيبصلها وبعدين ضحك ضحكة كبيرة وقالها انتي عارفة انك تاني واحدة تطلب مني الطلب ده الشهر ده؟ قالها انا اصلا اهلي هيموتوني عشان اتجوز بنت خالتي، وكل يوم والتاني عاملين لي عشا عائلي عشان اشوفها، انا موافق بس بشرط واحد، انتي كمان تمثلي انك حبيبتي قدام اهلي مرة واحدة بس عشان اخلص من زنهم، ميار وافقت فورا وقالتله اتفقنا، وسموا الخطة دي بينهم الخطة ب.
جه اليوم اللي نائل هيجي فيه البيت عند ميار، كان لابس قميص بسيط وبنطلون جينز عشان ميبانش الفرق الكبير اوي بينهم، وجايب معاه جاتوه من لابوار واتنين لتر بيبسي، ام ميار كانت هتطير من الفرحة وفضلت تزغرط في المطبخ، وابوها قعد يسأله بتشتغل ايه وساكن فين وبتقبض كام بطريقة محرجة، نائل كان ذوق جدا وقالهم انه بيحب ميار جدا من ساعة ما شافها في معرض الكتاب وانها بنت مثقفة ومحترمة وجدعة ومش شبه اي بنت شافها قبل كده، لينا اختها كانت قاعدة بتبص ومستغربة وبتقول في سرها اختي جابت الواد الجامد ده منين، والخطة نجحت جدا جدا، امها من تاني يوم بطلت تكلمها عن العرسان وبقت تقولها قومي يا عروسة نائل اعملي لنا شاي.
بعدها باسبوع كان الدور على ميار ترد الجميل، نائل قالها عندنا عشا عائلي يوم الجمعة ولازم تيجي عشان ماما عايزة تشوفك، ميار راحت واشترت فستان من محل على قدها في العتبة بأخر فلوس معاها، وتولين سلفتها شنطة وكوتشي، وراحت الفيلا بتاعتهم في الشيخ زايد، اول ما دخلت اتصدمت من الحجم والجنينة الكبيرة والناس اللي لابسة دهب والموسيقى الهادية اللي شغالة، قابلت مامته مدام فريدة ست شيك اوي وجميلة بس بتبص من فوق لتحت بطريقة تخوف، وقابلت اخوه الكبير كرم اللي كان قاعد ساكت وبيبصلها كأنه بيقيمها وبيحللها، كرم ده كان عكس نائل تماما، جد جدا وشايف نفسه وبيشتغل مع ابوه في الشركة ومسئول عن كل حاجة، وقالها ببرود اهلا يا ميار نائل كلمنا عنك كتير اوي.
ميار كانت مرعوبة من
لمحة نيوز