كذبه القدر
جواها بس مثلت كويس اوي، قعدت تتكلم بثقة وتحكي ازاي هي ونائل بيحبوا القراءة وازاي هو ساعدها لما شنطتها اتقطعت وازاي هو طيب وحنين، نائل كان مبسوط بيها جدا وعمال يبصلها بنظرة اعجاب حقيقية، حتى كرم بدأ يبتسم في الاخر وقالها برافو انتي شاطرة، بس اللي حصل بعد العشا ده مكنش معمول حسابه خالص، مامته عجبتها ميار جدا عشان مش شبه البنات الفيك اللي بيشوفهم نائل اللي كلهم عايزين فلوسه وعربيته، وقالت لنائل البنت دي محترمة ومتربية اوعى تسيبها يا نائل.
ومن هنا الخطة ب بدأت تخرج عن السيطرة تماما، ام نائل كلمت ميار تاني يوم الصبح وقالت لها تعالي يا حبيبتي اشربي معايا قهوة في النادي، ميار اتوترت وكلمت نائل بسرعة قالها معلش تعالي مرة كمان وهننهي الموضوع بعدها، ميار راحت النادي وهي لابسة نفس الفستان، لقت مامته جايبالها علبة قطيفة فيها اسورة دهب تقيلة وبتقولها دي بتاعة جدتي وانا كنت شايلاها لنائل لما يخطب وانا عايزاكي انتي اللي تلبسيها يا ميار، ميار كانت هتعيط وحست انها بتكدب على ست طيبة بتحبها بجد وحست بذنب كبير.
وفي نفس الوقت في بيت ميار، ابوها بقى يقول لنائل يا ابني يا حبيبي، وامها بقت تحضر في جهازها وتقول لجيرانها بنتي هتتجوز راجل غني وساكن في فيلا، ولينا اختها بقت تقولها يا بختك يا ميار نفسي ابقى زيك، حتى تميم ابن خالتها اللي كان بيحبها من زمان من ايام المدرسة وميار رافضاه عشان بتحسه اخوها، جه واتخانق معاها في الشارع وقالها انتي بعتيني عشان فلوسه؟ انتي بقيتي مادية؟ ميار حاولت تفهمه انه تمثيل بس مقدرتش تقول الحقيقة عشان خافت يفضحها.
المصيبة الكبيرة حصلت لما كرم اخو نائل قرر يعمل مفاجأة ونزل فجأة المكتبة اللي ميار شغالة فيها من غير ما يقول لحد، كان عايز يشوفها بتشتغل فين وبتعمل ايه، دخل لقاها واقفة بتزعق لصاحب المكتبة عشان عايز يخصملها نص المرتب عشان اتأخرت عشر دقايق، وشاف لبسها البسيط والبهدلة والتعب اللي هي فيه، وشاف تولين صاحبتها بتواسيها، روح البيت وقال لنائل بقرف انت متأكد ان البنت دي بتحبك مش بتحب فلوسك؟ شكلها جعانة، نائل اتضايق جدا واتخانق معاه وقاله ميار اشرف وانضف بنت شفتها في حياتي ومش هسمحلك تتكلم عليها كده، كرم قاله طب لو بتحبك بجد خليها تيجي حفلة الشركة السنوية وتقدمها كخطيبتك رسمي قدام كل الناس والصحافة.
نائل جه لميار وهو متلخبط ووشه مخطوف وقالها بصي يا ميار انا عارف اننا اتفقنا شهر واحد بس اهلي خلاص اعتبروكي خطيبتي رسمي وماما بقت تكلم خالتي عنك وانا لو قلتلهم اننا بنمثل هيمسحوا بيا الارض وخصوصا ماما هتزعل اوي، ممكن نكمل كمان شوية لحد ما اشوف صرفة؟ ميار كانت خلاص تعبت من الكدب والتمثيل وقالتله وانا كمان اهلي خلاص بيجهزوا للخطوبة وبيكلموا النجار عشان يعمل اوضتي ولو قلتلهم الحقيقة ابويا هيطردني من البيت، قعدوا هما الاتنين في العربية ساكتين ومش عارفين يعملوا ايه وفجأة نائل بص لها بصة طويلة وقالها هو احنا ليه بنمثل اصلا؟ ما احنا ممكن نحب بعض بجد ونبطل تمثيل؟
ميار اتصدمت وقلبها دق جامد وقالتله انت بتهزر صح؟ انت عايز تضحك عليا؟ قالها لا والله انا بتكلم بجد، انا من اول مرة شفتك وانتي واقعة في الشارع والكتب واقعة حواليكي وانتي مصممة تلميها لوحدك من غير ما تطلبي مساعدة وانا معجب بيكي وبتفكيرك، ومع الوقت لما شفتك مع اهلك ومع اهلي وجدعنتك وطيبتك حبيتك بجد يا ميار، ميار سكتت ووشها احمر وحست انها كمان بتحبه بس كانت بتكتم عشان فرق الفلوس والمستوى اللي بينهم كان كبير اوي وكانت خايفة يقول عليها طماعة.
حفلة الشركة السنوية جت وكانت معمولة في فندق كبير خمس نجوم، ميار لبست فستان بسيط شيك لونه اسود وتولين عملتلها شعرها وميكب على قدها، دخلت الحفلة ونائل اول ما شافها راح مسك ايدها قدام كل الناس والموظفين والصحفيين وقال بصوت عالي احب اعرفكم ده ميار خطيبتي وحبيبتي واغلى حاجة في حياتي، كل الناس سقفت ومدام فريدة كانت بتعيط من الفرحة وكرم كان واقف بيبص بابتسامة غريبة، فجأة وسط التسقيف ده كله ظهر تميم ابن خالتها لابس لبس الويتر، اصله كان جاي يشتغل في الفندق عشان محتاج فلوس يساعد امه، اول ما شاف ميار لابسة فستان ومسكة ايد نائل اتجنن وصرخ بصوت عالي قدام كل الناس وقال انتي كدابة انتي مش خطيبته انتي متفقة معاه عشان تضحكي على اهلك وتسكتيهم، انا سمعتك بوداني وانتي بتتكلمي مع صاحبتك في المكتبة وبتقولي انها خطة.
الدنيا كلها سكتت مرة واحدة والموسيقى وقفت وكل العيون بقت على ميار، مدام فريدة بصت لميار مصدومة ومش مصدقة، وكرم بص لنائل بغضب وقال شفت؟ مش قلتلك؟ ميار حست ان الارض بتلف بيها ودموعها نزلت غصب عنها ومقدرتش تستحمل كلمة كمان وطلعت تجري بره القاعة وهي بتعيط، نائل طلع يجري وراها وكرم طلع وراهم وتولين ولينا جم وراهم، ميار قعدت تعيط في جنينة الفندق وتقول انا اسفة انا كدبت عليكم كلكم، انا بنت فقيرة واهلي كانوا ضاغطين عليا وانا استغليت طيبة نائل، انا
