خطه زوجه

حبيبة: عيب كده ده ابوك مهما يحصل اوعي تقول كده فاهم، و يلا علشان نلحق نجهز للفرح

احمد باستغراب: و حضرتك هتروحي كمان

حبيبة: أيوة يا حبيبي،يلا نجهز.
///////
في اوضة حبيبة

تجهز قدم المرايا و تشوف نفسها بإعجاب و كلمت نفسها: كنت عارفة من بدري يا ياسر،حسيت أن في واحدة تانية،أنا مش غبية و لا عامية ، كنت بشم ريحة برفان حريمي في هدومك، و بشوف رسايل بينك و بينها في نص الليل بس بكبر دماغي و اقول بلاش ابص علشان مشوفش حاجة توجع قلبي، و كنت عارفة أن النهاية هتكون حاجتين ،يتبعد عنها و ترجع ليا و ل ولادك، أو تختار تكمل معها، و انت اخترتها و انا مش عايزة اطلق و اتعذب في المحاكم علشان اخد النفقة ،لا هعيش في بيتي و تصرف عليا و على ولادك،انا بحبك و زعلانة عليك،بس الموضوع بعد كده هيكون مادي و بس، مقدرش أنكر المستوي المادي اللي عايشة فيه معك علشان كده هكمل معك ، و كده انت اخترت سعادتك في الزوجة التانية و انا اخترت سعادتي في الفلوس و العربية و الدهب.

ظبطت الحجاب و خرجت من الاوضة ،احمد قال باعجاب: على فكرة بقي بابا هو الخسران.

لفت حوالينا نفسها بدلع و قالت:طبعا يا ابني امكم قمر.

محمد: متقوليش امكم بس انتي زي اختنا الكبيرة و ل أقولك الصغيرة

ضحكت و قالت: طيب يلا يا حلوين على فرح ابوكم.

خرجت حبية مع ولادها ،و ركبت العربية الفخمة و هي بتقول: الحب حاجة مهمة ،بس مفيش مانع أن الفلوس حلوة برضو..

طبعا هي فكرت بالعقل و ركنت القلب على جنب ،بس ده مينعمش أنها بتقول كده و تصبر نفسها علشان هي و ياسر بينهم قصة حب كبيرة..
///////////
بعد شوية.

وصلت حبيبة مع اولادها ،و دخلوا القاعة تحت ذهول الكل.

و نرجع تاني ،بعد ما سلمت حبيبة و اولادها على جوزها و مراته ،قعدوا على ترابيزة لوحدهم و الكل مستغرب وجودها و هي معرفتش حد من أهلها أن جوزها هيتجوز..

في مكان العروسين

ياسر كانت عيونه على حبيبة اللي كأنه اول مرة يشوفها، و عايز يقوم ياخدها و يخبيها عن عيون الكل

نور( العروسة الجديدة ) : هي مراتك بتعمل ايه هنا؟

ياسر من غير ما يبص عليها: بتعمل ايه يعني، زي ما انتي شايفة جاية تبارك

نور بعصبية: هو ده طبيعي أن واحدة تجي فرح جوزها