منه
منه كانت واقفة قدام المراية في اوضتها بتلبس البلطو الابيض بتاعها وبتظبط شعرها وهي حاسة ان الدنيا كلها تحت رجلها. منه عندها سبعة وعشرين سنة وبقت دكتورة في الجامعة وبتدرس مادة صعبة جدا في كلية تجارة. كل الناس كانت بتقول عليها كبرياء ماشي على رجلين. مش بتضحك لحد ولا بتجامل حد وشايفة نفسها احسن من الكل عشان اتخرجت بتقدير واتعينت بسرعة. كانت بتمشي في الكلية والطلبة يوسعولها كأنها وزيرة.
في نفس اليوم ده كان فيه طالب جديد داخل المدرج متأخر. اسمه ياسين. ياسين عنده تسعة وعشرين سنة. شكله مختلف عن باقي الطلبة. لابس قميص بسيط ودقنه خفيفة وعينه فيها تحدي. ياسين كان مخلص ثانوي ودخل الجيش وبعد ما خلص جيشه قرر يرجع يكمل تعليمه. اهله كانوا على قدهم وهو اشتغل كذا شغلانة عشان يصرف على نفسه. دخل المدرج وقال السلام عليكم بصوت واطي.
منه بصتله من فوق لتحت وقالتله انت مين وازاي تدخل متأخر كده. قالها انا ياسين طالب جديد في الفرقة. قالتله برا المدرج بتاعي مابحبش حد يدخل بعدي. ياسين قالها بس انا كنت بعمل ورق في الشئون وده اول يوم ليا. منه قالتله وانت فاكر نفسك هتتحجج وهدخلك. اطلع برا. كل الطلبة سكتوا. محدش كان يقدر يرد عليها. ياسين بص لها ثانية وبعدين خرج وهو ساكت بس من جواه كان مولع.
من ساعتها الحرب ابتدت. ياسين بقى يحضر كل محاضراتها في اول بنش. منه كانت بتحاول تتجاهله بس هو كان مركز مع كل كلمة بتقولها. منه كانت بتشرح من الكتاب بس بطريقة حافظة مش فاهمة قوي. في مرة وهي بتشرح نظرية اقتصادية كبيرة اتلخبطت وقالت معلومة غلط. ياسين رفع ايده وقال دكتورة بعد اذنك النظرية دي مش كده. النظرية دي بتقول العكس والدكتور اللي كاتب الكتاب ده قال كده في الصفحة اللي بعدها.
القاعة كلها اتقلبت. منه وشها احمر من الكسوف. هي متعودة ان محدش يراجع وراها. قالتله انت جاي تعلمني شغلي ولا ايه. قالها لا انا بس بصحح معلومة عشان زمايلي مايفهموش غلط. قالتله اطلع برا ومشوفش وشك في محاضرتي تاني. ياسين لم كتبه وخرج. بس الطلبة من ساعتها ابتدوا يشوفوا ياسين بطل.
منه روحت يومها معيطة في عربيتها. هي عمرها ما حد احرجها كده. كانت حاسة ان كرامتها اتهانت. حكت لصاحبتها رشا. رشا كانت معيدة معاها في نفس القسم وطيبة وبتحبها. رشا قالت لها يا منه اهدي الولد ده شكله غلبان وراجع يكمل تعليمه بعد الجيش مش لازم تقفشيله. منه قالت لها انتي مشفتيش بيبصلي ازاي كأنه بيستقل بيا. انا هسقطه في مادتي وهوريه.
