منه
في مرة الجامعة عملت رحلة علمية لمصنع كبير. منه كانت مشرفة على الرحلة وياسين كان موجود. الاتوبيس عطل في الطريق في حتة مقطوعة والسواق مش عارف يعمل ايه. الدكاترة اتوترت ومنه كانت هتعيط. ياسين نزل من الاتوبيس وفتح الكبوت وقعد يصلح فيه مع السواق. ايده اتوسخت وعرق جامد بس في الاخر الاتوبيس اشتغل. كل الطلبة سقفوله. منه بصتله بنظرة مختلفة. نظرة اعجاب.
لما وصلوا المصنع منه كانت بتشرح حاجة غلط تاني. ياسين المرة دي مقاطعهاش قدام الناس. استنى لما خلصت وراح قالها بينه وبينها يا دكتورة المعلومة اللي قلتيها محتاجة تتصحح عشان الطلبة. منه بصتله واستغربت انه ماحرجهاش. قالتله شكرا انك مقولتش قدامهم. قالها انا مش هدفي احرجك. انا هدفي ان المعلومة توصل صح.
من اللحظة دي منه اتغيرت. بقت تحضر للمحاضرة بضمير اكتر. بقت تقرا مراجع اجنبية. بقت متواضعة شوية مع الطلبة. والكل لاحظ التغيير ده.
ياسين حس ان منه اتغيرت وبقى يحترمها اكتر. بقى يشوف فيها بنت مجتهدة ووحيدة. عرف من رشا ان منه مامتها وباباها مسافرين برا وهي عايشة لوحدها وانها شايلة مسئولية كبيرة من صغرها عشان كده بقت ناشفة.
في يوم منصور عم ياسين تعب جامد ودخل المستشفى وياسين مكنش معاه فلوس. محسن قاله نعمل ايه. ياسين كان هيبيع تليفونه. منه عرفت من رشا بالصدفة. راحت المستشفى من غير ما تقول لحد ودفعت الفلوس في الحسابات ومشيت. ياسين لما عرف ان حد دفع اتجنن. سأل رشا مين اللي دفع. رشا في الاول مرضتش تقول بس بعد الحاح قالتله منه.
ياسين راح لمنه تاني يوم في المكتب. قالها ليه عملتي كده. قالتله عشان انت محتاج مساعدة. قالها بس انا ماطلبتش منك حاجة. قالتله انا عارفة بس انا حسيت اني عايزة اساعدك. انا اسفة على كل حاجة عملتها معاك قبل كده. كنت مغرورة وغبية.
ياسين سكت شوية وبعدين قالها وانا كمان اسف لو كنت قاسي عليكي. انتي دكتورة شاطرة ومجتهدة وانا احترمتك من اول يوم بس كبريائك كان بيستفزني. منه ضحكت لاول مرة قدامه ضحكة حلوة قوي. وقالتله يعني احنا صحاب دلوقتي. قالها لا احنا اكتر من صحاب.
من ساعتها العلاقة بينهم اتغيرت خالص. بقوا يتكلموا كتير بعد المحاضرات. ياسين بقى ييجي المكتب يساعدها في تحضير المحاضرات وهي بقت تساعده في المذاكرة. الحب كان بيكبر بينهم بس كان ممنوع. ممنوع عشان هي دكتورة وهو طالب. لو حد عرف هتبقى فضيحة.
