كانت بنت زاي القمر
دينا كانت بنت زي القمر، بنت ناس طيبين من عيلة كبيرة في الصعيد، عايشة في بيت العيلة الكبير اللي مليان عزوة ولمّة، أبوها الحاج عمرو راجل شديد وكلمته سيف على الكل، وامها الست منه ست حنينة بس ما تقدرش تكسر كلمة جوزها، وكان ليها صاحبة عمرها سندس اللي كانت أكتر من أخت، سرها كله معاها، بيتهم جنب بيتهم وبيذاكروا سوا من ابتدائي لحد الجامعة.
دينا من وهي صغيرة وهما راسمين لها طريقها، انتي لبنت عمك فارس، فارس ولد عمها اللي متربي معاها في نفس البيت، راجل صعيدي أصيل، جدع وشهم، كلمته واحدة، بيحبها من وهو عيل صغير بيلعب معاها في الحوش، بس عمره ما عرف يعبر، كان فاكر ان الحب أفعال مش كلام، يجيب لها الحاجة قبل ما تطلبها، يقف للي يبص لها بصة مش عاجباه، يحميها كأنها حتة منه، ولما كبرت ودخلت الجامعة كان بيستناها كل يوم على أول البلد يطمن انها رجعت بالسلامة، من غير ما يقول كلمة.
بس دينا قلبها كان في حتة تانية خالص، في الجامعة في القاهرة قابلت فادي، واد شكله حلو ولسانه حلو، بيعرف يقول كلام يدوخ البنات، لابس على الموضة وبيحط برفان غالي، قالها بحبك من أول نظرة، وانتي غير أي حد شفته، وانا هاخدك ونعيش في القاهرة بعيد عن قيود الصعيد والعادات دي، هنسافر وهنعيش حياتنا، ودينا اللي كانت طول عمرها نفسها تتنفس حرية صدقت، حست ان فادي هو طوق النجاة، هو الحب اللي بيتكلموا عنه في الأفلام والروايات، مش جواز الصالونات اللي أهلها عايزينه.
فضلت تكلم فادي في السر سنة كاملة، تحكي لسندس عليه وسندس كانت خايفة عليها وتقولها يا دينا خدي بالك الواد ده كلامه كتير وشكله مش سالك، عينيه بتلمع بالكدب، وكل شوية يطلب منك فلوس أو هدية، ده مش حب، بس دينا كانت غرقانة، كانت بترد تقولها انتي بس عشان مجربتيش الحب بتقولي كده، فادي بيحبني وهياخدني من هنا.
ولما أبوها الحاج عمرو قال خلاص هنحدد معاد كتب كتابك على فارس، الدنيا اسودت في وشها، جريت على أمها منه تعيط، قالت لها يا اما انا مش بحب فارس، بحب واحد تاني، منه اتخضت وقالت لها اخرسي يا مقصوفة الرقبة، هتفضحينا، فارس سيد الرجالة، واللي بتحبيه ده واد من القاهرة هياخدك يلعب بيكي ويرميكي، قالت لأبوها مش عايزاه يا بوي، قالها هو ده اللي عندنا، كلمة الرجالة ما بتنزلش الأرض، انتي محجوزة لابن عمك من يوم ما اتولدتي، وجهزوا الفرح في أسبوعين.
