رهف
نديم بعد كده فتح لرهف مشروع صغير، مكتبة كبيرة فيها كتب وروايات عشان رهف كانت بتحب القراية اوي، وسمى المكتبة على اسمها مكتبة رهف، ورهف بقت تروح كل يوم تقعد هناك وتقرا وتساعد الطلبة، ونديم كان بيعدي عليها بعد الشغل ياخدها ويروحوا ياكلوا كشري زي ايام زمان لما كانوا غلابة، واوقات كتير كانوا بيروحوا نفس الرصيف اللي اتقابلوا فيه اول مرة ويقعدوا يضحكوا ويقولوا هنا بدأت الحكاية، هنا كذبة صغيرة غيرت مصير اتنين، وهنا عرفنا ان الجواز مش فلوس ولا غصب، الجواز ستر وامان وحب بجد، وكل اللي حواليهم كانوا بيحسدوهم على حبهم اللي جيه من كذبة وتحول لحقيقة اجمل من اي رواية.
وفي ليلة من الليالي، تولين قعدت مع رهف في المطبخ وقالت لها يا بنتي انا عايزة اعترفلك اني اول ما عرفت انك مش حامل فرحت اوي بس خوفت من ابوكي، بس نديم طلع راجل بجد، راجل شهم، وقف قدام ابوكي وقاله انا بحب بنتك وعايزها، مش كل الرجالة بتعمل كده، رهف حضنت امها وقالت لها يا ماما انا كنت هموت من الرعب بس ربنا سترها معايا، ولو رجع بيا الزمن عمري ما هكذب الكذبة دي تاني، بس في نفس الوقت لولا الكذبة دي مكنتش هعرف نديم.
بسمله كمان اتخطبت لقريب نديم، شاب اسمه فادي كان شغال معاه في الشركة، وده خلى الصحوبية بين رهف وبسمله تزيد اكتر، بقوا يخرجوا سوا ويتفسحوا سوا، وكل مرة بسمله تقول لرهف انتي وشك حلو عليا، انتي السبب اني عرفت فادي، رهف تقولها يا بكاشة انتي السبب اني متهورتش وانتحرت يوم ما ابويا قالي هتتجوزي قيس.
اما قيس بقى فبعد ما اترفض راح اتجوز بنت من البلد وطلقها بعد شهرين عشان طبعه وحش، وكل اهل البلد بقوا يقولوا سبحان الله، اللي كان فاكر نفسه هياخد رهف غصب ربنا عاقبه، ورهف ربنا عوضها براجل احسن منه مليون مرة.
وفي اخر كل يوم، لما نديم ورهف يقعدوا في البلكونة بتاعة الفيلا بتاعتهم، يشربوا شاي ويبصوا للقمر، نديم يقولها تصدقي يا رهف انا لحد دلوقتي مش مصدق ان كذبتك انتي وكذبتي انا خلونا نلاقي بعض، رهف تقوله واحنا هنفضل نكذب على الناس ولا هنقول الحقيقة، نديم يضحك ويقولها لا خلاص كفاية كذب، احنا هنعيش الحقيقة وبس، والحقيقة اني بحبك يا رهف، ورهف تقوله وانا بموت فيك يا نديم يا اللي كنت شحات وبقيت سيد قلبي.
