امير ما كانش بني ادم عادي
ومع ذلك نور كانت بتحاول، كانت بتحاول تكون كويسة وتصلح، تعمل الأكل اللي بيحبه وتستناه بالساعات، تلبس الحلو كله وتتعطر عشان يعجب بيها، تقوله يا أمير أنا ذنبي ايه، أخويا لو عمل فيك حاجة وحشة أنا مالي، أنا عمري ما أذيتك، هو كان يرد يقولها انتو كلكو عيلة واحدة، دم واحد، نصب واحد، انتي من دمه يعني زييه.
عدت شهور ونور بتدبل يوم عن يوم، وشها خس النص، عينيها دبلت من العياط والسهر، شعرها كان بيقع من الزعل، حتى ريتاج أختها الصغيرة لما جت تزورها مرة بعد ما اتحايلت على أمير شهر، شافتها كده اتخضت وشهقت، قالت لها مالك يا نور، انتي كنتي زي القمر وريحتك حلوة، ايه اللي جرالك، نور مقدرتش تمسك نفسها وحضنت أختها وقعدت تعيط بصوت عالي، ريتاج قالت لها احكيلي يا أختي متخبيش عليا، نور حكتلها كل حاجة من أول يوم لآخر يوم، ريتاج اتصدمت ودمها فار، قالت لها لازم تقولي لماما ولازم نبلغ البوليس، نور قالت لها لا يا ريتاج، ماما ست كبيرة وعيانة بالقلب ومش هتستحمل صدمة زي دي، وكمان أخوكي جاسر فين، محدش عارف هو فين ولا بيعمل ايه، لو عرف هييجي يقت..لك انتي وهو.
في يوم، أمير كان قاعد في أوضته بيدور على ورق قديم يخص قض..ية جاسر، كان ناوي يرفع قض.ية تانية يجيب فلوسه، وهو بيدور في الدولاب بتاع نور عشان يدور على أي حاجة تخص جاسر، لقى شنطة قديمة مقطعة بتاعة نور، شنطة كانت جايباها معاها من بيت أهلها فيها كتب الجامعة، فتحها لقى فيها دفتر صغير جلده بني، دفتر مذكرات، فتحه وبدأ يقرا بخط نور الجميل، وهنا الدنيا لفت بيه والدنيا اسودت في وشه.
لقي نور كاتبة بخط مرتعش، يا رب أنا خايفة قوي على أمير، جاسر أخويا بيخطط ينصب عليه، أنا سمعته امبارح بالليل وهو بيكلم واحد اسمه سيف، سيف ده المحامي بتاعه الشمال، بيقوله هنسحب الفلوس كلها بكرة الصبح وهنهرب، أنا حاولت أسرق الورق من أوضة جاسر بس هو قافل الدرج بالمفتاح، أنا بعت لرقم أمير رسالة من خط غريب من سوبر ماركت وحذرته وقلتله خلي بالك من جاسر هيسرقك، بس هو مردش عليا ولا عبرني، يا رب احميه يا رب.
أمير إيده اترعشت وقلبه دق جامد، قلب الصفحة اللي بعدها بسرعة، لقى رسالة تانية، بتاريخ تاني قبل النصب بيومين، أنا النهاردة رحت شركة أمير، كنت عايزة أقوله كل حاجة وش لوش، بس خفت جاسر يشوفني ويضربني، شفته من بعيد وكان مشغول وبيضحك ومبسوط، سيبتله جواب صغير على مكتب السكرتيرة وكتبتله فيه إن جاسر مزور إمضته وإن التوكيل مزور، يا رب السكرتيرة تديهوله، يا رب يكون قراه قبل فوات الأوان.
