امير ما كانش بني ادم عادي
أمير بدأ يرسم الخطة، رجع وقف على رجله تاني بفلوس بسيطة كانت معاه وبدأ يظهر في حياة نور، بقى يروح يشتري من السوبر ماركت اللي تحت بيتهم كل يوم، بقى يصلي في الجامع اللي جنبهم عشان أبوها الروحي يشوفه، بقى يساعد الست ديما تشيل أكياس الخضار ويوصلها لحد البيت، بقى يظهر لها في كل حتة، بكلامه الحلو وشياكته وهدوئه ونظراته اللي كلها حنية مزيفة، نور اللي عمرها ما حد اهتم بيها كده ولا حد قالها كلمة حلوة من قلب أخوها، حست إنها أخيرا لقت راجل بجد هيشيلها في عينيه، وأمير كان بيمثل الحب وهو جواه نار بتاكل فيه.
في خلال شهرين بس، أمير قدر يدخل قلبها وقلب أمها، طلب إيد نور، ديما طارت من الفرحة وقعدت تزغرط، ده شاب محترم وابن ناس ومعاه فلوس وشاري، وجاسر لما كلموه في التليفون وافق بسرعة جدا، أصله كان عايز يخلص من مسئولية أخته عشان محدش يوصله عن طريقها، وافق وقالهم اعملوا اللي انتو عايزينه ومتوجعوش دماغي، نور كانت طايرة من الفرحة، كانت فاكرة إنها لقت الأمير اللي هياخدها على حصان أبيض ويعيشها في قصر، وميعرفوش إن الأمير ده جاي ينتقم ويهد القصر على دماغها.
الفرح كان بسيط وفي قاعة صغيرة، أمير مرضيش يعمل فرح كبير وقالها عايزك ليا لوحدي ومش عايز حد يبص عليكي، نور صدقت وفرحت وقالت ده بيغير عليا، وبعد الفرح خدها على شقته، شقة كبيرة وفخمة في المعادي كان مأجرها جديد، بس من أول يوم دخلت فيه الشقة، كل حاجة اتغيرت مية وتمانين درجة.
أول ما باب الشقة اتقفل والمفتاح لف، أمير بصلها بصة كلها قرف وقالها اسمعي يا بنت جاسر كويس قوي، انتي مش عروسة ولا حبيبة، انتي تمن، تمن الفلوس اللي أخوكي الحرامي سرقها مني، انتي هنا خدامه، تاكلي وتشربي وتنامي وتتكلمي لما أنا أقولك، فاهمة ولا أفهمك بطريقتي، نور اتصدمت وافتكرته بيهزر هزار تقيل، قالتله انت بتقول ايه يا أمير، انت سخن ولا ايه، قالها أنا متجوزتك عشان أكسرك، وعشان أكسر مناخير أخوكي النجس لما يعرف إن أخته بقت خدامه تحت رجلي وبتنام في أوضة لوحدها.
نور قعدت تعيط طول الليل لحد ما عينيها ورمت، مش فاهمة ايه اللي بيحصل، تحاول تكلم أخوها جاسر موبايله مقفول على طول، تكلم أمها الست ديما، أمها تقولها استحملي يا بنتي بكرة يعقل، جوزك أكيد مضغوط في الشغل والرجالة كلها كده أول الجواز، بس أمير كان كل يوم يوريها الويل وزيادة، يصحيها من الفجر تنضف الشقة كلها، لو لقى تراباية صغيرة على الترابيزة يقلب الأكل في الأرض ويقولها انتي فاشلة زي أخوكي، يمنعها تروح الجامعة ويقولها انتي مكانك المطبخ، يمنعها تكلم صحابها وياخد منها تليفونها، كان بيتعمد يهينها قدام أي حد، قدام البواب وقدام صحابه لما ييجوا يسهر وا ويضحك ويقولهم دي بنت الحرامي اللي سرقني.
