مج نسكافيه

صافى يا لبن
– لااااااااااااااااا
– تقى
– عاوز ايه
– مج نسكافيه
*****************

الحلقه الخامسه
بعد فترة … صمم الجد على انه يروح يقعد ف الصعيد فترة… وطبعا محدش قدر يعارض كالعادة
الا تقى… حايلت جدها كتير عشان يقعد.. وحاولت بكل الطرق… بس كالعادة كلام جدها هو اللى مشى
سافر الجد…. وبعدها بساعتين سمعت صريخ ف البيت… الجد عمل حادــ,,ـثة واتنقل المستشفى وف حالة خطر
جريوا على المستشفى كلهم … كان ادهم نقله على المستشفى اللى شغال فيها… من ملامح وشه ظهر ان الوضع صعب وشبه منتهى
كلهم بيواسوا بعض ويعيطوا بهستيريا.
الا تقى… كانت بعيدة
سندت ضهرها على الحيط وبصت لفوق….

كانت بتناجى ربنا من غير ماتنزل دمعة ..
لقت ايد بتطبطب عليها … ادهم… اخدها على اوضته…
– قولى يا رب
هزت راسها من غير ماتتكلم… مالقاش كلام تانى يقولهولها… سابها وخرج
– يا رب… وحيات حبيبك النبى ماتحرمنيش منه هو كمان … انا ماليش غيره
انا امى راحت منى ومادوقتش طعم حضــ,,ـنها… وابويا عمره ماسال عنى غير لو طلبت فلوس… واهلى كل واحد مشغول بحاله
الا جدو… هو اللى ليا… هو الحضــ,,ـن الوحيد اللى بيضمنى … هو اللى بشوف ف عنيه الفرحة لما بيشوفنى… هو الوحيد اللى كان بيطبطب عليا ويمسح دموعى لما ازعل..

وعشان كدة عمرى ما عيطت الا ف حضــ,,ـنه عشان مش هلاقى حد غيره جنبى… طب لو راح هيكون ليا مين يا رب… هبقى يتيمة من كل الناس… عود طالع لوحده كدة
يا رب خد من عمرى واديله… مش عاوزة اعيش لو هو مش موجود… واعيش ليه ولمين … يا رب هو شديد اه لكن روحه وقلبه فيهم طيبة وحنية تكفى الدنيا باللى عليها..

من غيره مفيش حنية ولا حب ولا راحة ولا امان
يا رب لو هتسترد وديعتك خدنى انا كمان… يااااارب اشفيه وقومهولى … يا رب انا هضيع وامــ,,ـوت من غيره وفعلا ماليش غيره
كان ادهم على الباب … سمع كل كلامها… وشاف دموعها لاول مرة … كان مصدوم وحزين من كلامها…
لفها ناحيته… شاف كمية الالم اللى ف ملامحها… اخدها ف حضــ,,ـنه وضمها اوى … وقالها
– يااااااه… للدرجادى انتى وحيدة وسطنا؟؟؟

ليه يا تقى… دانتى عارفة غلاوتك عندى… ليه كمية الحزن والوجع اللى جواكى دول وماتقوليش
هى كانت بتعيط لدرجة انها مش قادرة تتنفس او ترد عليه
فضل يطبطب عليها لحد ما بدات تهدى .. وبعدين بعدها عنه وبص ف عنيها وقال
– انا واثق ان ربنا هيشفيه بدعاكى دا … لانى عارف كويس انك قريبة من ربنا
جاب مصحف واداهولها وقالها
– خدى اقرى ف المصحف وادعى كمان… بس من غير عياط
فضلت تقرا قران اكتر من ٣ ساعات بدون توقف… لحد ماجه ادهم بسرعة وقالها….