الحاج عدنان
الخناقة صوتها علي اوي والمحامي كان سامعهم من الكاميرات وكلمهم وقالهم خدوا بالكم لو كملتوا الخناقة هتخسروا الورث، ساعتها الاتنين سكتوا وبعدوا عن بعض، بالليل فارس قعد لوحده في الجنينة وبلال راح قعد جنبه من غير ما يتكلم، فارس قاله فاكر لما كنا صغيرين وكنا بنتخانق على العجلة وجدو كان بيجي يصلحنا، بلال ضحك وقاله اه وكان بيقولنا الاخوات اللي يتخانقوا على لعبة هيكبروا يتخانقوا على ورث، واحنا اهو بنتخانق على ورث بجد، وسجي كانت سامعاهم وبتضحك.
فارس قاله عندك حق احنا بقينا وحشين اوي، جدو مكنش عايز يورثنا فلوس بس كان عايز يورثنا بعض، كان عايزنا نفتكر اننا عيلة، بلال قاله اه والله انا من ساعة ما قعدت هنا حسيت براحة مكنتش حاسس بيها من سنين، من ساعة ما كل واحد راح في حتة واحنا اتفرقنا، فارس قاله وانا كمان، وسجي قالت لهم جدو عدنان كان بيقول ان الفلوس بتروح وتيجي انما الاخوات مبتتعوضش.
في نص الشهر تقريبا فارس جاله تليفون من الشغل بيقولوا له المشروع هيبوظ لو مرجعش، فارس اتوتر جدا وقعد يفكر يسيب البيت ويمشي، بس بلال قاله لو مشيت دلوقتي هنخسر كلنا، استحمل الاسبوعين دول، فارس قال انا خايف اخسر شغلي، سندس قالت له
يا فارس الشغل بيتعوض انما احنا لو اتفرقنا مش هنتجمع تاني، وسلسبيل قالت له فاكر لما كنت انت اللي بتجمعنا واحنا صغيرين وكنت بتعملنا طيارات ورق، فارس ضحك وقال ايوة كنت بعملها من ورق الكراريس، وسجي قالت له خلاص خليك واعتبر ان الطيارة دي هي العيلة وانت اللي سايقها.
وفي يوم تاني سلسبيل تعبت وجالها برد جامد وسخونية، مكنتش قادرة تقوم من السرير، سندس فضلت قاعدة جنبها طول الليل بتعملها كمادات، وبلال جاب لها دوا من العيادة، وفارس قعد يحكي لها حواديت عشان تنام زي ما جدهم عدنان كان بيعمل، سلسبيل قالت لهم انا اول مرة من زمان احس ان حد خايف عليا كده، من ساعة ما سافرت عشان الكلية وانا لوحدي، فارس قالها احنا جنبك على طول.
وكمان حصل موقف غريب، لقوا في اوضة الكراكيب صندوق خشب قديم مقفول، فتحوه لقوا فيه صور قديمة ليهم وهم صغيرين مع جدهم عدنان، ولقوا جوابات صغيرة كان كاتبها لكل واحد فيهم، جواب لفارس بيقوله يا فارس انت الكبير ولازم تخلي بالك من اخواتك، وجواب لبلال بيقوله يا بلال قلبك الطيب ده كنز حافظ عليه، وجواب لسلسبيل بيقولها يا سلسبيل الوانك هي اللي هتنور البيت، وجواب لسندس بيقولها يا سندس صوتك العالي ده هو اللي بيصحي البيت، وجواب لسجي بيقولها يا سجي انتي اللي هتفضلي تلمينا حواليكي.
