نغم كانت واقفه في المستشفى
نغم قعدت طول الليل تفكر، كرامتها بتصرخ من جواها بس صورة امها وهي بتتوجع كانت اكبر من اي كرامة، تاني يوم راحت قابلت هيثم في كافيه شيك في الزمالك، اول ما شافته لابس بدلة غالية وساعة شكلها بمبلغ وقدره حست انها صغيرة قوي قدامه، هيثم بص لها، كانت لابسة عباية بسيطة وطرحة سودة وعنيها حمرا من العياط بس كان فيها حاجة شدته، جميلة بجد بس مكسورة.
هيثم قال لها بصي يا نغم انا هبقى صريح معاكي، انا مش عايز جواز بجد، انا عايز واحدة تمثل انها مراتي لمدة سنة قدام اهلي وقدام حبيبتي القديمة واهلها، هنعمل فرح كبير وهنعيش في الفيلا بس كل واحد في اوضة، وانتي ليكي حياتك وانا ليا حياتي، بعد سنة هطلقك واديكي المؤخر اللي هنكتبه وهتاخدي فلوس العملية، نغم قالت له وانا موافقة بس بشرط، الفلوس بتاعة العملية تتحول للمستشفى قبل كتب الكتاب، وامي ما تعرفش انها جوازة مصلحة، لازم تفتكر انه جواز بجد، هيثم وافق.
كتب الكتاب كان في قاعة صغيرة والفرح كان كبير جدا زي ما هيثم كان عايز، عزم حبيبته القديمة واسمها ليلى، ليلى جت لابسة فستان احمر ومستغربة مين دي اللي هيثم اتجوزها، نغم كانت لابسة فستان ابيض بسيط كانت تقي مختاراه لها، كانت زي القمر بس متوترة، طول الفرح هيثم كان بيبص على ليلى عشان يشوف غيرتها، وليلى فعلا كانت هتموت من الغيرة، بس نغم خدت بالها من نظراته وحست بوجع غريب في قلبها، مع انه جواز مصلحة بس حست انها رخيصة.
بعد الفرح راحوا الفيلا، الفيلا كانت كبيرة قوي، تلات ادوار وحمام سباحة، نغم دخلت وهي مبهورة، هيثم قال لها بصي دي اوضتك ودي اوضتي، ودي شروط البيت، ممنوع تدخلي اوضتي من غير اذن وممنوع تسأليني رايح فين وجاي منين، وانا كمان مش هسألك، نغم قالت له وانا كمان ليا شروط، ممنوع تجيب بنات هنا وممنوع تشرب سجاير في الصالة عشان ريحة امي لما تيجي تزورني، وممنوع تعلي صوتك عليا، هيثم ضحك بسخرية وقال لها انتي فاكرة نفسك مراتي بجد ولا ايه، نغم قالت له لا انا فاكرة اني بني ادمة وليا احترام.
من تاني يوم بدأت الخناقات، نغم بتصحى بدري وتعمل فطار وتسيب المطبخ مش نضيف، هيثم يتعصب ويقول لها انتي جاية منين، انتي فلاحة، نغم ترد تقول له اه فلاحة بس متربية احسن منك يا بتاع الفلوس، هيثم كان بيستفزها بكلامه عن الفلوس وهي كانت بتستفزه بعنادها، مرة اتخانقوا عشان نغم فتحت التكييف على تمنتاشر وهو عايزه على اربعة وعشرين، ومرة اتخانقوا عشان هي بتتفرج على مسلسل تركي بصوت عالي وهو عايز يتفرج على ماتش، ومرة اتخانقوا خناقة كبيرة عشان نغم لمت هدومه اللي مرمية في الارض وحطتها في الغسالة وهو كان عايز يلبس قميص معين وملقهوش فزعق لها وقال لها انتي مين سمح لك تلمسي حاجتي، وهي عيطت وقالت له انا مش خدامة عندك.
