نغم كانت واقفه في المستشفى
نغم كانت واقفة في طرقة المستشفى ماسكة الروشتة في ايدها وايدها التانية بتترعش، الدكتور لسه قايل لها ان امها محتاجة عملية قلب مفتوح في خلال اسبوعين بالكتير والا حالتها هتتدهور، والعملية تمنها متين وخمسين الف جنيه غير العلاج والمصاريف، نغم بصت للورقة وحست الدنيا بتلف بيها، هي يا دوب بتشتغل في مكتبة صغيرة ومرتبها كله على بعضه تلات تلاف جنيه وبتكملهم بدروس خصوصية لعيال الحتة، ابوها متوفي من خمس سنين وسايبها هي وامها واختها الصغيرة تقي اللي لسه في ثانوية عامة.
روحت البيت لقت تقي قاعدة جنب امها ايمان اللي وشها اصفر وتعبانة، ايمان حاولت تبتسم وقالت لها ها يا نغم الدكتور قال ايه، نغم بلعت ريقها وقالت الحمد لله يا ماما شوية تعب وهيبقوا كويسين، دخلت اوضتها وقفلت الباب وانهارت من العياط، قعدت تفكر هتجيب الفلوس منين، خبطت على كل البيبان، حتى راحت لخالها وائل اللي طول عمره بيقول انا سندكم، اول ما سمع المبلغ اتهرب وقال لها والله يا بنتي الظروف صعبة اليومين دول وانا داخل جمعية كبيرة.
في نفس الوقت ده كان في الناحية التانية من القاهرة واحد اسمه هيثم قاعد في فيلا كبيرة في التجمع، هيثم شاب عنده تلاتين سنة، ورث عن ابوه شركة مقاولات كبيرة ومعروف انه غني جدا، بس طول عمره قلبه مقفول بعد ما حبيبته القديمة سابته واتجوزت واحد خليجي عشان الفلوس، كان قاعد مع صاحبه اسامه في المكتب واسامه بيقول له يا بني انسى بقى، البت دي باعتك من زمان، هيثم كان متعصب وبيقول مش قادر انسى انها قالت عليا عيل ومش هعرف اعيش من غيرها، نفسي اوريها اني اقدر اتجوز احسن منها في ثانية.
اسامه ضحك وقال له طب ما تتجوز بجد، هيثم سكت لحظة وبعدين قال فكرة، انا هتجوز جوازة شكل كده عشان اغيظها، اجيب واحدة اقعدها معايا سنة واعمل فرح كبير واعزمها واوريها اني اتخطيتها، اسامه قال له انت مجنون حد يتجوز عشان يغيظ حد، بس هيثم كان مصمم وكان بيدور على اي واحدة توافق على جوازة المصلحة دي.
الصدفة جمعت نغم بهيثم عن طريق وائل، وائل كان شغال مقاول صغير مع شركة هيثم، ومرة وهو بيتكلم مع السكرتيرة سمع حكاية هيثم، راح جري قال لنغم بقولك ايه، في واحد غني جدا عايز يتجوز جوازة على الورق لمدة سنة ويدي للبنت فلوس، نغم في الاول شتمته وقالت له انت اتجننت يا وائل عايز تبيعني، وائل قال لها يا بت افهمي، الراجل محترم ومش هيقرب لك، ده جواز رسمي على سنة الله ورسوله بس اتفاق بينكم سنة وتتطلقوا، وهو هيدفع تمن عملية امك كاملة وفوقهم خمسين الف جنيه ليكي انتي واختك.
