نغم كانت واقفه في المستشفى
اسامه كان بيجي يزورهم ويشوف الخناقات دي ويضحك ويقول يا لهوي انتوا عاملين زي القط والفار، هو عمره ما شاف هيثم بيتخانق مع حد كده على حاجات تافهة، كان متعود ان هيثم بارد ومش بيهتم، تقي كانت بتيجي تزور نغم وتلاقي هيثم مكشر فتقول لنغم ايه الراجل الكشري ده، نغم تقول لها معلش يا تقي هو طيب من جواه بس بيستعبط، ايمان امها لما جت تزورها بعد العملية وكانت خفت شوية قالت لنغم جوزك شكله بيحبك يا نغم، عينه بتلمع لما بيشوفك، نغم ضحكت بوجع وقالت يا رب يا ماما يكون كلامك صح.
مع الوقت بدأت حاجات صغيرة تتغير من غير ما يحسوا، هيثم بقى يلاحظ ان نغم بتصحى الفجر تصلي وتدعي لامها وتدعي له هو كمان من غير ما تعرف انه سامعها، وانها بتحافظ على فلوسه كأنها فلوسها، مرة لقت فازة غالية اتكسرت فعيطت واعتذرت له كتير، هو استغرب انها خايفة كده على حاجته مع انها مش حاجتها، ومرة هو تعب وجاله دور برد جامد وسخونية، نغم فضلت سهرانة جنبه طول الليل بتعمل له كمادات وشوربة عدس وبتقيس له الحرارة كل شوية، هيثم صحي لقاها نايمة على الكرسي جنبه ماسكة طبق الشوربة في ايدها، حس بحنية عمره ما حسها في حياته، حتى ليلى عمرها ما عملت معاه كده.
نغم كمان بدأت تشوف حتة تانية في هيثم غير اللي بيوريها للناس، مرة لقت بيعيط في اوضته عشان ذكرى وفاة ابوه وكانت الليلة دي عيد ميلاد ابوه، دخلت من غير ما تخبط وحضنته وقالت له معلش يا هيثم، انا عارفة احساس اليتم صعب ازاي، هو اتفاجئ من حضنها بس ما زقهاش وفضل معيط على كتفها شوية، ومرة شافته بيساعد الجنايني يشيل حاجة تقيلة مع انه لابس بدلة وغالية، ومرة سمعته بيكلم اسامه وبيقول له انا مش عارف مالي بقيت بستنى اروح البيت عشان اشوف نغم هتتخانق معايا على ايه النهاردة، بقيت بحب اتخانق معاها، اسامه قال له يا حبيبي انت وقعت ولا الهوا رماك، انت حبيتها يا هيثم، هيثم سكت وما ردش بس قلبه كان بيدق جامد.
الغيرة بقى هي اللي فضحت كل حاجة مرة واحدة، كان في حفلة كبيرة عاملها هيثم للشركة ونغم كانت معاه لابسة فستان سواريه اسود جميل كان هو اللي جايبه لها غصب عنها وقال لها لازم تلبسيه، كان شكلها يجنن وكل الرجالة في الحفلة بيبصوا عليها، واحد من رجال الاعمال اسمه وائل كان معزوم في الحفلة وفضل يقرب من نغم ويقول لها انتي زي القمر وجوزك ده مش مقدرك، ده مخليكي لوحدك طول الحفلة، نغم كانت متوترة ومش عارفة تتصرف وكانت بتدور بعنيها على هيثم، هيثم شاف المنظر من بعيد الدم غلي في عروقه وقام مرة واحدة، راح مسك ايد نغم جامد وسحبها لحضنه وقال للراجل بصوت عالي دي مراتي، مراتي انا، لو سمحت خليك بعيد عنها واحترم نفسك، كل الناس بصت عليهم، نغم اتصدمت من رد فعله لانه طول عمره بيقول انها مش مراته بجد وده مجرد تمثيل.
