مي كانت بنت عاديه جدا

مي كانت بنت عادية جدا بس قلبها كان مليان حياة كانت في كلية آداب قسم علم نفس سنة تالتة وكانت دايما قاعدة مع صحابها ايمان وياسمين في الكافيتيريا بتاعة الجامعة تضحك وتهزر بس عمرها ما كانت شايفة كمال

كمال كان معاها في نفس الدفعة بس من اول سنة وهو بيحبها حب من طرف واحد كان بيشوفها كل يوم وهي داخلة المدرج بشعرها اللي عاملاه كحكة وشنطتها اللي كلها دبابيس ملونة وكان قلبه بيدق جامد بس هي عمرها ما خدت بالها منه اصلا كانت بتعتبره زي اي حد في الدفعة سلام عابر وخلاص

عدت سنة واتنين وتلاتة وكمال كل يوم حبه بيزيد وهي ولا هنا كانت مركزة في دراستها وفي حياتها وفي صحابها ايمان اللي كانت عقلانية جدا وياسمين اللي كانت مجنونة وبتحب الهزار وكمال كان واقف بعيد بيتفرج

في مرة كان قاعد مع صاحبه هيثم في القهوة وبيحكي له انه خلاص تعب هيثم قاله يا ابني روح قولها بحبك وخلصنا بقى كمال قاله مقدرش انا بقالي تلت سنين بحاول الفت نظرها بكل الطرق وهي مش شايفاني اصلا هروح اقولها ايه هيثم قاله خلاص شوفلك طريقة تانية بس متفضلش كده

وفي نفس القعدة صاحبه التاني خالد قاله بص يا كمال البنات بتحب اللي يفهمها اللي يعرف تفاصيلها اللي تبقى صاحبته الاول وبعدين حبيبته كمال سمع الكلمة ودماغه بدأت تودي وتجيب

روح البيت وفضل سهران طول الليل يفكر لحد ما جتله فكرة مجنونة فكرة مقدرش يقاومها قرر يعمل اكونت فيك باسم بنت سماها ياسمين برضه بس ياسمين تانية غير ياسمين صاحبتها سماها ياسمين نور وبعت لمي طلب صداقة مي في الاول مردتش بس بعد يومين قبلت

بدأ يكلمها كياسمين ازيك يا مي انا بشوفك في الجامعة وشكلك لطيفة اوي وحابة اتعرف عليكي مي كانت في الاول بترد ردود قصيرة بس ياسمين الفيك كانت ذكية جدا كانت بتتكلم بطريقة بناتي اوي وبتفهم في الميكب واللبس والمسلسلات وكل حاجة مي بتحبها

شوية شوية بقوا صحاب جدا بقوا يتكلموا كل يوم بالساعات مي بتحكيلها كل حاجة عن يومها عن محاضراتها عن ايمان وياسمين صحابها عن مشاكلها في البيت عن انها نفسها تحب وتتحب بس خايفة عن انها حاسة انها مش واثقة في نفسها كفاية

وكمال من الناحية التانية قاعد بيسمع وبيسجل كل كلمة كل نقطة ضعف وكل نقطة قوة كل حاجة بتحبها وبتكرهها عرف انها بتحب القهوة بلبن الصبح وبتكره الزحمة وبتخاف من الضلمة وبتحب تسمع فيروز وهي بتذاكر وانها نفسها حد يفاجئها بورد حتى لو وردة واحدة