خفايا القدر

فاقت غزال على صوته بصتله بتوتر
غزال : ها أنا كويسه بس سرحت شوية ..
خلصت يلا أنا جهزت لك الحمام أدخل وأنا هطلعلك هدومك ولما تخلص هتلاقيهم عندك ..

بيجاد : لما تكبر ملاك هنحميها كمان صح ..

غزال : أنا بحميها هي كمان ..

دخل بيجاد الحمام وغزال جهزت له كل حاجة هيحتاجها
غزال : بيجاد هحطلك الهدوم على السرير ..
اتحركت علشان تخرج لكن فجأه سمعت صرخت واحده من بيجاد

**********************************************
رحمة : مراتك إزاي يابني واتجوزتها إمتا ..

خالته : يلا يابنتي بلاش نضحك على بعض يارحمة لما إبنك متجوز طلبتي إيد بنتي ليه ..

رحمة : أنا مكنتش أعرف أنا زي زيك يا أختي ..

خالته : عن اذنكم وألف مبروك يابن أختي ..مسكت ايد بنتها وخرجت

سيف : أنا بعتذر إني مقولتلكيش ياماما لكن أنا بحب أمل وبصراحه لسه ماكتبناش الكتاب ..

رحمة بحنان : تعالي يابنتي إقعدي جنبي ..

أمل قعدت جنبها لما حست بطيبتها
رحمة : إسمك جميل زيك ياقمر أنا أهم حاجة عندي سعادة إبني أنا عايزه أشوف ولاده قبل ما أموت ..

أمل : بعد الشر عليكي إن شاءالله تشوفي ولاده وتشيليهم ..

رحمة : أهلها فين ياسيف علشان نتفق معاهم على موعد لكتب الكتاب ..

سيف كان هيرد قاطعته أمل
أمل بحزن : أنا يتيمة ماعنديش أهل كبرت وحيدة في ملجأ ..

رحمة بحزن : من النهاردة أنا أمك طبعاً لو معندكيش مانع ..

حضنتها أمل وانهارت
سيف بهزار : إيه قلبتوها نكد ليه أنا عايز أفرح ..

رحمة : تمام ياحبيبي هتبقى معانا هنا وبكرة نكتب الكتاب ..

سيف : إن شاءالله ياماما تعالي معايا ياأمل عايز اتكلم معاكي شوية ..

رحمة : خليك يابني أنا هطلع أوضتي أرتاح شوية وإنتوا اتكلموا براحتكم ..

خرجت رحمة أمل بصتله بغضب وقفت سيف مسك ايدها بعدت عنه بقوة
أمل بعصبية : إنت بتكذب على والدتك ليه باين إنها طيبه ..

سيف : أمي مريضه وعايزاني اتجوز من بنت خالتي أو أي بنت وأنا مابفكرش في الجواز دلوقتي وعلشان ماتزعلش أنا كنت بدور على بنت اتجوزها كام شهر وأطلقها وأقول لماما إننا ما اتفقناش ..

أمل : وعايزني اشارك معاك في لعبتك دي مش مكسوف وإنت بتكذب على والدتك ..

سيف : وافقي بس وأنا هدفعلك المبلغ اللي تطلبيه ..