هل فات الاوان ناهد خالد

تنهد يقول :
– ريهام لو عملت ده تبقي خدعتني , لما أكون متفق معاها علي حاجه وتوافق ويبقي في دماغها تغدر يبقي ملهاش آمان , لو كانت من الأول رفضت كنت هحترم رغبتها لكن توافق وتلف من ورايا وتعمل الي هي عايزه , مش هقبل بده .

وكأنه يؤكد لها دون أن يقصد أنه لا يسامح , ضغطت علي شـ,ـفتيها تهدأ توترها وهي تقول :
– بس أنت بتحبها , والي بيحب بيسامح .
رد بنفي :
– مش دايمًا , أوقات بيبقي المساحه كبيره أوي أكبر من الحب حتي .
صمت لثوانِ وعاد يقول بحيره حقيقيه :
– بعدين أنا مبقتش عارف أحدد مشاعري ناحية ريهام , يمكن من كام شهر كنت عارف أني بحبها وعاوز أكمل معاها حياتي , لكن دلوقتي قلقان ومبقتش عارف هي مناسبه ليا ولا لأ .
تسائلت بلهفه غير مقصوده ولحظها أنه لم ينتبه لها :
-أنت قصدك بطلت تحبها ؟
نفي يقول :
– لا , بس مبقتش عارف أحدد مقدار حبي ليها , وكمان اي الفايده إني أحبها بس متكونش مناسبه ليا , الحب لوحده مش كفايه .
تسائلت بإحباط :
– لي بتقول أنها مش مناسبه ؟
– لما اتخانقنا امبارح مفكرتش تكلمني تشوف هعمل اي , حتي بعد المؤتمر مكلمتنيش برضو , وكأن الموضوع ميخصهاش , وامبارح وأنا قاعد مع عيلتها حسيتها بتتمنظر بيا , أنا مبحبش أن القاعده تبقي عليا أو حد يفضل يمدح فيا , وهي طول القاعده مورهاش غير انجازاتي وسفرياتي وخطط هي حطاها للمستقبل احنا مخططنهاش مع بعض , يعني فضلت تقول احنا هنقضي شهر العسل في المالديف و كل ايفنتات عروض الأزياء الي في لندن وباريس وروما هنحضرهم , بتتكلم وكأني فاضي مثلاً , وكمان موضوع شهر العسل الي في المالديف ده أنا معرفش عنه حاجه ! , ولا لما اتكلمت عن الفرح وخططها له , هي قررت وخطت وأنا آخر من يعلم , تخيلي لاقيتها حاجزه شاليه في الساحل من غير ما اعرف ولسه فاكره تقول امبارح بالصدفه في العشاء , أنا اتفاجأت زيهم , لأ وكمان حجزاه عشان تعمل فيه party الحنه هي وأصحابها ! والأغرب أنها بعد العشاء قالتلي أن أنا الي هدفع الحجز وكمان عاوزاني ابعت حد من الشركه يعمل ديكورات الحفله .. منكرش أني انجذبت لريهام وشوفتها مناسبه ليا في الأول وده الي خلاني أدخل معاها في ارتباط , بنت من عيله ومعروفه ولطيفه , منكرش أنها جذبتني ليها ومعرفش امتي وازاي ارتباطنا , بس أوقات بحس إن كل ده مش كفايه , عارفه أنا كنت بسكت علي خروجتها ولبسها وعلاقتها بالشباب الي بيشتغلوا معاها عشان كنت كل ما اكلمها تقولي احنا مفيش بينا رابط ولا متجوزين عشان تتحكم فيا , كنت بضطر اسكت لأن فعلاً كانت علاقه من غير اي رابط رسمي , بس دلوقتي بعد ما بقت مراتي , أنا أكيد مش هسكت علي طريقة حياتها دي ومش هقدر اتقبلها , بس عارف أن هي كمان هتعاند وهيحصل بينا مشاكل كتير .