هل فات الاوان ناهد خالد

انتبهت علي دقات فوق باب الجناح.. اتجهت تفتحه فوجدت محمد يقف أمامها هتفت مرحبه :
_أهلاً ياعمي اتفضل..
دلف للداخل واتجه ليجلس بغرفة المعيشه وقال لها :
_تعالي يا داليا عاوز اتكلم معاكِ…
جلست أمامه تنتظر حديثه.. قال لها بتساؤل:
_الأول عامله اي أحسن؟
قطبت حاجبيها باستغراب تتسائل:
_حضرتك عرفت منين إني تعبانه؟
_شوفت الدكتور وهو نازل من عندكوا امبارح وسألت سليم عليكِ النهارده…

_الحمد لله كويسه..
قال بمغزي :
_سليم قالي أنه مكنش راضي ينزل الشركه النهارده عشان ميسبكيش لوحدك بس أنتِ الي أصريتي..
فهمت أن حديثه به مغزي ما فقالت :
_حضرتك تقصد اي؟
_اقصد أن سليم بدأ يهتم بيكِ…
تسائلت بهدوء :
_وده معناه اي؟
ابتسم بهدوء يقول :
_لا يمكن إخفاء الحب مهما حاولنا فالمرأة تفضحها الغيرة والرجل يفضحه الاهتمام.
قطبت حاجبيها برفض وهي تقول :
_حضرتك تقصد أن سليم بيحبني! أكيد لأ..
_مقولتش بيحبك.. بس الأكيد أنه بدأ في أول خطوه للحب.. الحب موجوده في سلمه قبلها سلالم كتير عشان توصليله.. وسليم بقي في الدرجه السادسه …
تسائلت بفضول وحماس :
_وهي اي الدرجات دي؟
_بصي أول درجه من درجات السلم الي بيوصل للحب .. (الاستلطاف) .. أنك تستلطفي الشخصيه الي قدامك تستلطفي طريقتها.. أو اسلوبها في الكلام.. والدرجه التانيه..( الإنجذاب).. أنك تبقي منجذبه له وبتحبي تسمعيه وتتابعيه بعينك في كل حاجه بيعملها..والدرجة الثالثه ( المراقبه) إنك تراقبيه في كل تصرفاته وحركاته….. . والدرجه الرابعه ( الإعجاب).. الإعجاب الي بيكون نتيجه لمرقابتك له فتعجبي بيه.. والدرجه الخامسه ( التعود).. تتعودي تشوفيه وتتابعيه وتعرفي عنه كل حاجه حتي لو من بعيد وتحسي بالنقص لو بعد عنك… والدرجه السادسه ( الخوف).. أنه يخافك عليكِ من كلام الناس أو من تعب أو لو غبتي ومعرفش يوصلك ويبدأ عقله يصورله اي الي ممكن يكون حصلك.. والدرجه السابعه ( الاهتمام) الي برضو نتيجه للخوف… لما أخاف عليكِ ههتم بيكِ من خوفي هبقي عاوز أعرف عنك كل حاجه وأتابعك عشان ابقي مطمن.. والدرجه الثامنه ( الغيره).. ودي مش محتاجه شرح.. والدرجه التاسعه بقي ( التملك).. بس طبعًا بحدود.. يعني أني ابقي عاوزك معايا معظم الوقت وأتضايق لو لاقيت حد بيشغلك عني.. بس كل ده بحدود ميكنش تملك مرضي يقضي علي اي حاجه حلوه بينا… وبعدها توصلي للدرجه العاشره وهي أهم درجه…