هربي ولادك

#
حكايات_نورهان_العشري
لو عايزين تعرفوا حصل أيه سيبولي لايك و كومنت و هرد عليكم باللينك ♥️
النسخ مسموح و لكن يُحذر على السادة الناشرين حذف اسمي من المقال داخل اللينك أو في الاقتباس و من يفعل ذلك يتم عمل بلاغ حقوق ملكية ✌️

رانيا فضلت واقفة قدام سعيد، مستنياه يرد على كلامها، لكنه فضل باصصلها باستغراب، كأنه لأول مرة يشوف الست اللي كانت من شوية بتترجاه ما يسيبهاش، واللي كانت بتفرح من أقل كلمة حلوة يقولها لها.
سعيد حاول يضحك ضحكة صغيرة وهو بيقول:

ـ إيه يا رانيا؟ إنتِ بتتكلمي بجد؟ يعني إيه مش جوزك ومش هتقربي مني؟ هو إحنا في مسرحية؟ أنا جوزك على سنة الله ورسوله، واللي بينا محدش يقدر يغيره.
رانيا بصتله من غير ما ترمش، وردت بهدوء أخطر من الصريخ:

ـ وإنت فاكر إن الجواز ورقة بتديك الحق تعمل اللي إنت عايزه؟ فاكر إنك لما تكتب اسمي في قسيمة جواز يبقى بقيت تملك قلبي وجسمي وعمري؟ لأ يا سعيد، إنت غلطان. أنا كنت مراتك لما كنت فاكرة إنك راجل بيحبني وبيخاف عليا، لكن دلوقتي إنت بقيت بالنسبة لي أبو ولاد، وراجل مسؤول عن مصاريفهم، وبس.

سعيد اتنرفز من نبرة صوتها.
ـ إنتِ بتعاقبيني عشان رجعت لمراتي الأولى؟ طب وأنا أعمل إيه؟ أرمي عيالي في الشارع عشان أرضيكي؟ أسيب أمهم وأهد بيتي؟
رانيا هزت راسها وهي بتقول:

ـ محدش قالك سيب عيالك، ولا حد قالك تهد بيتك. أنا كل اللي كنت عايزاه إنك تقولي الحقيقة من الأول. كنت تقول لي إنك متجوز، وإنك مش قادر تستغنى عن مراتك، وإنك عايز تتجوزني عشان تبقى مرتاح معايا ومعاها. كنت ساعتها هبقى حرة أوافق أو أرفض.

إنما إنت عملت إيه؟ بنيت حياتي على كذبة، ولما اتكشفت، بدل ما تعتذر، جيت تحطني قدام اختيارين، يا أعيش خدامة عند أمك وأربي عيالك، يا أرجع للمكان اللي إنت عارف كويس إني كنت بهرب منه.

سعيد سكت لحظة، وبعدها قال بنفاد صبر:

ـ يا ستي اعتبري إني غلطت، وأنا بعتذر لك. بس الحياة لازم تمشي، وإنتِ عندك عيال وأنا عندي عيال، وأمي ست كبيرة ومحتاجة حد يرعاها. وإنتِ بدل ما تقفي جنبي، بتعملي مشكلة من كل حاجة.

رانيا ضحكت ضحكة قصيرة، فيها وجع أكتر من أي عياط.

ـ أقف جنبك؟ أنا كنت مستعدة أقف جنبك لو الدنيا كلها وقفت ضدك. كنت مستعدة أبيع دهبي عشان أساعدك لو اتزنقت، وكنت مستعدة أعيش معاك في أوضة على السطوح لو ده اللي تقدر عليه. لكن عمري ما تخيلت إنك هتخليني أعيش في أوضة فوق أمك عشان تفضي الشقة الكبيرة لمراتك، وبعدين تيجي بكل بجاحة تقول لي إني لازم أقف جنبك.